Research Proposal Ṭialning Tawi

Research Proposal cu zeidah a si?

Research Proposal cu research ṭial hnikmi kong zeitin ka tuah lai timi bantuk ṭialmi a si i, cucu M.A/Ph.D ti bantuk sianginn sok tik siloah, thesis/disertation ṭialding timh tuahmi langhtermi khi an si. Zeitindah ka tial lai timi le, research tuahdingmi tungtlang pawl kha felfai te in langhtermi an si. Afoinak in research tuahdingmi kongkha a tawi fiannak in ṭialmi a si. Cucu kong cu kan hun langhter lai.

Zeitindah tungtlang (content) kan ṭhen lai?

Research tuahning hi aa lo cio lo nain, social science he aa pehtlaimi cawnnak ahcun (1) Introduction (2) Literature Review (3) Methodology (4) Data Collection (5) Data Analysis le Discussion (6) Conclusion tiah an ṭhen bik. Hi ṭhen (6) kong cu atanglei bantuk in a si lai.

(1) Introduction

Introduction cu Lai ca ṭial tik i biahmai ṭhi khi a si. Hikaa ahcun ca chung i a ummi pawl siloah saduh thah pawl kha tawifiang te in ṭial ahau. Phundang in careltu hna lunglak ding ah biahmaiṭhi cu a biapi taktak. Cu ti a biapimi cu atanglei bantukin an ṭialbik theo tawn.

a.       Statement of Problem
A ṭling lomi siloah  a chambaumi, aa palhmi ti bantuk ruang ah phisin a haumi tete problem a umnak kha fiangte in langhter ahau. Hi ti problem a ummi nih zeidah a chuahpi kho lai ti le phisin aherhnak te hna ṭial chih tikah careltu lung a lak khun.

b.      Saduhthah (Purpose of Study/Objective)
- Research paper nih aa tinhmi cu ṭling le fiang te in ṭial a hau. Cheukhat ahcun hikaa ahcun ho te nih dah hi bantuk hi an rel awk a si le zeidah a chuahpi lai ti zong kha an telh chih tawn.

c.       Research Question
- Research Question cu research nih a kawlmi siloah a tuah hnawhchanmi biahalnak kha a si ko. Biahalnak (Question) a um lo ahcun a phi (Answer) a um lo  bantuk in buaibainak (Statement of problem) a um lo ahcun biahalnak a um ve lo. Mah ca ah hikaa ahcun kawl aherhmi (research) ahaunak (Question) in langhter ahau. Cucu (Question) phit le kawl cu research paper ahcun a biapi ngaimi a si.

d.      Hypothesis
Hypothesis cu a foinak in ruah damhmi khi a si ko. Cu ruahdamhmi test ning null hypothesis le alternative hypothesis tin a um. Null hypothesis ruahdamhmi a dik lo, siloah aphi ruahchanmi he aa dangmi a phi a chuah khi a si. Cun, alternative hypothesis timi cu reseracher nih a zumhmi le a ruahning te in a dik ko timi a phi a chuakmi kha a si.
Example,
“Laitlang ahcun Pa cu nu nakin an thla-hlawh a sang deuh ” hi hypothesis hei sisehlaw,

·         Null hypothesis nih cun – Laitlang ah nu le pa thla-hlawh aa dang lo (khat) ti lei kap in a test lai.

·         Alternative hypothesis nih cun – Laitlang ah nu nakin pa an thla hlawh a sang deuh ti kha a test lai.

(2) Literature Review

Literature review timi cu research tuah hlan ah research tuah duhmi topic kong he pehtlai in hlan deuh scholar pawl nih zeitin an rak hmuh le an rak ruah timi kha langhter a si. A bik in, hikaa ahcun caṭialtu nih ṭial hnawhchan a duhmi le a um ciami literature kar ah a baumi te kha langhter i, kawl herhnak thlir khi a si. Acheu khat nih cun Literature Review tang ahcun Theoritical Framewokre an chiah i, cu in cun conceptual framework an ser.

(3) Method

Research proposal ca ahcun zeitin research ka tuah lai timi method langhter hi a biapi bik a si, ti a si. Hikaa ahcun “study design” in zeitin in, khoikaa, zei bantuk caan ah, zei lam in tbk in research tuah i timhnak kha langhter ahau.

Example,

·         Laitlang ah nu le pa an thla-hlawh aa khat timi tlangtar kha research topic a si ahcun, research method ca ah a si kho mi cu nu le pa thim i, thla-hlawh aa khah le aa dannak hlat. Siloah, Company pawl thla-hlawh pekning cu December thla ah Hakha ah motor in ka kal lai i ka hlat lai ti bantuk langhter kha a si.

A foinak in cun research method cu researcher nih aa ziak bikmi lam in aa tinhmi saduhthah hmuh khawhding method aa thimmi a si.

(4)  Data Collection

Data collection timi cu research tuah itimhmi topic kong he pehtlai in aherhmi data pawl khomhning kha  asi. Data khomning cu thiam lo ahcun research tuah caan arau kho i, thiam ahcun research lim afoi ca ah data collection cu a biapi ngaingai. Data collection laknak pahnih a um; primary data le secondary data ti, a si. A sullam cu primary data cu a um bal lomi kong mah te in ningcang ser i, data lakning a si. E.g, Laimi nih Rohingya hi kan daw maw ti kong hngalh duh ca ah mi va hal i, data lak tbk. Cun, secondary research cu a um ciami data lak kha a si. Bn, Laitlang ah pa le nu thla-hlawh zohnak timi tlangtar kha research topic a si ahcun, mi pakhat nih nu thla-hlawh research a tuahmi a um cang ahcun khakha lak i, data ah hman kha secondary data lakning cu a si.

Cu ti data khomh tikah qualitative research method le quantitative research method hi an biapi ve. Afoinak in Qualitative cu survey, biahal tbk ruahnak va hal phun hramh a bunhmi khi a si. Research paper chuah tik zong ah “kong lam” kha cafang in ṭial an si. Nain, quantitative research method cu number le symbol he langhter deuh a si. A sullam cu quantitative research method hman ahcun cawsa a ei lomi nih zei ruang ah cawsa an ei lo timi nakin cawsa a ei lomi (5) an si ti bantuk in vun langhter kha a si. Chanthar ahcun quantitative research method hi a hung lar ngaimi pakhat a si. Aruang cu ca nakin number, kanan ti bantuk in langhter a si ca ah thiam ahcun caan aheu deuh.

(5) Data Analysis/ Data Zoh Fel Siloah Result or Finding

Hikaa ahcun data lakmi vialte kha ṭha te in rel le zoh dih hnu ah a phi langhter kha a si. Phundang cun research tuahmi vialte siloah tinhmi kha hikaa ahcun a dik or dik lo langhter a si. Bn, Laitlang ah pa le nu an thla-hlawh aa khat timi research tuahmi cu “tax an pekmi zoh tikah aa khat or a khat lo” ti bantuk hoi in langhter kha a si. Cheukhat nih cun hi number (5) hi Main Argument an ti i, research hmuhmi kong chimnak a si ca ah a biapi tuk hringhran, an ti. Cucaah, ca an rel tikah research question le research method a dih cun hikaa hi direct in an zoh theo tawn ve. Acheukhat nih cun data analysis an tuah dih hnu ah discussion an tel ve theo tawn.

* Cheukhat cu (4) le (5) hi a fonhmi zong an um ve.

(6) Conclusion

Conclusion cu bia donghnak a si ca ah research cu zeitin in rak tuah a si i, zeidah a hmuh ti bantuk in bia tlangkhar kha a si.