Aa Phundangmi 2021 Dothlennak, Rammi Ca Ruahchannak - III

Min Aung Hlaing nih 2020 November 8 thimnak ah NLD nih thimfung an fir tiah a puh ruang i a chuakmi uknak chuhnak cu hlawhtlin lo in a um i, thlapa thla 9 leng ram a buai cang. Hi thla 9 chung ah sang 14 rammi cu bawmh hau dirhmun an phan i, sang 6.4 rammi cu ei awk an ngei ti lo. Sang 1.2 rammi cu umnak hmun inn ngei lo i, tlik le zaam in nganfahnak an tuar__ ram lak ah a zaammi zong an um tiah NUG biachimnak nawl ngeihtu Chin miphun Dr. Sa Sa nih DVB ah a chim. A him deuhmi khuapi zong ah rallokap pawl cu chun he zaan he mi tlaihding an kawl, mi sual lo an tlaih hna lengmang ruang ah mipi cheukhat cu an tuahṭuanmi dawr te hmanh hung ngam lo in, an i thup. Zaan a chuah tikah ralokap pawl cu zu an ding, sa an ei. Meithal an thlah thlulh thelh lengmang ruang ah Myanmar ram i, Min Aung Hlaing uknak chuh timh hnu thla 9 dirhmun cu ralhrang nih a luh hnawhmi ram bantuk dirhmun bantuk a si cang. Aluancia caan  ah  Aa Phundangmi 2021 Dothlennak, Rammi Ca Ruahchannak - II ka ṭial cang i, hikaa ah rel khawh rak i zuam te u. Tutan capar III ahcun November zarhthum i a cangmi thil tawi tete news update style in ka rak ṭial lai.

Rallokap Pawl nih NUG kha Ralhrang tin Ramdang Sin Cakuat 

Mah hi thil a can hi zarh hnih fai a lonh cang. Mi tampi an lau i, a si tak hnga maw tiah theih an duh. Rallokap nih an tuahmi cu NUG nih PDF kha rammi cheukhat thahnak nawl a pek hna. Thahding min cazin chung ah a sual lomi zong an um. Hihi ralhrang cawlcanghnak a si. Ramdang tampi nih nan theih aherh tiah Yangon i a ummi ramdang Embassy kip ah ca an kuat hna. Thahding min cazin an lakmi bal ho te an si tiah fiang te in theih ahar. Nain, Federal Journal nih a ṭialnak ah Myanmar ram i, peace process kong ah bochan ngaimi Min Zaw Oo le Hla Mawng Shwe te pawl an i tel tiah a ṭial. Rallokap nih hi ca in an i timhmi cu ramdang nih NUG cohlanning le bawmhnak power niamter i, NUG, CRPH le PDF kha ralhrang tiah cohlan ding khi a si. Hi ca kong he pehtlai in NUG lei nih cun lih le hrawkhrol puahchom ca a si. Min cazin an tuahmi zong sullam a ngei lo a si. NUG cu mipi ca rian a ṭuanmi mipi cozah a si. Ralhrang bantuk in mipi a thatding kan si lo tiah an chim.

NUCC nih Thawngthanh le Rallokap

NUCC nih ahmasabik press conference cu November 16 ah online in an tuah. Suimilaam 3 tluk a sau, NUG an i tel, Duh lonak a langhtertu hruaitu upa, le adangdang an i tel hna. A tlangpi in an chimmi lakah fiang ngai in hmuh khawhmi cu "2008 Phunghram ah kir bak lo" kha aa tel fawn. Cucu Min Ko Naing nih fiang te in a chim. Federal phung suai a simi mipi theihter a si te lai ti le tlangcung hriamtlai phu 8 le NUG rianṭuan ṭi a sinak te hna aa tel chih. EAOs phu 8 he rian ṭuanti a simi cu Myanmar ram tuanbia ah thlennak pakhat ngaingai a si ti hmuh khawh a si. Hi phu 8 cu hote an si tiah an fianh lo nain an cawlcanghning zoh tikah NCA min a thumi PPST chung lawng si lo in NCA min a thu lomi FPNCC chungtel 7 le KNPP chung zong in an i tel ti ruahdamh khawh a si. Hi press conference an tuah tlawmpal ah Min Ko Naing cu RFA nih twitter ah NUCC thawngthanh kong an ṭialmi news tang ah rallokap kuttang ah rian a ṭuanmi Ministry of Foreign Affair i Protocol Department ah bawi pakhat a simi, Ahlan rallokap cozah i, Secretary -2 arak simi Bohmu Tin Oo i a fapa Zaw Tun Too tlerhnak ca a ṭial.

Min Ko Naing, dawtnak he ruahnak kan pek. Zei hmanh a can hlan te ahhin rethei in rian ṭuan len lo in dai te in i dinding ruahnak kan pek. Anaih bik zarhkhat hlan ah atu thil vialte hi aa lim dih te lai. Na ca ah thla kan campiak. Ahnubik vawleicung na khualtlawnnak a dih hlan ah nang le kei Myanmar ram ah i ton ta ding kaa ruahchan." a ti.

Tlaih le Thahmi Min Cazin Chuah

Rallakap nih Rangon ah NUG nih an i bochan ngaimi NLD MP hlun Phyu Zeyar Taw an tlaih. November zarthumnak chung ah PDF a simi tlaih le thah a tongmi rammi (PDF) 40 fai an si i, NUG lei in PDF nih rallokap an thahmi milu zong 40 hrawng a si ve. Fiang deuh vun chim ahcun Sagaing ram ah an thahmi a tambik. Aa phundang ngaimi cu NUG nih rallkap minung 3 kan tlaih tiah thawng an thanhmi hi a si. EAOs hmunhma zong ah rallokap le rammi i tuknak cu a um len rih. CNA ralkap Salai Khua Tin Thang zong nih ram le miphun ca ah a nunnak a pek ve. Myanmar ram politics kong a rak kherhhlai lengmangtu Igor Blazevic nih cazin a chuahmi uknak lak in nihin tiang ah rallokap milu 3,959 an thi cang ti a si. September thla in mi a thimi cu an hung karh ṭhan duahmah i October thla dongh le November thla cheu kar in i kah dohnak in a thimi cu 1,351 leng an si, ti a si.

Biatlang komhnak

Atlangpi in kan zoh tikah NUCC nih NUG a rak dirh in siseh, nihin tiang EAOs he an i chawnhbiaknak ah duhsah te in an rian hma tampi  acunglei ah a kal timi hmuh khawh a si. NUG cu mipi cozah tiah ti an si nain an rian ṭuanning hi zeitluk in cozah rian a ṭuan khawh timi cung ah tampi mipi biakhiahnak cu a um te lai. NUG nih an dirhmi PDF cu nikhat hnu nikhat an ṭhawng deuh i, rallokap ca zong ah ṭihnung ngai a si ko timi cu Zaw Min Thun le BBC interviews ah tam ngai a lang. Zaw Min Thun nih, "Ral kan thah tikah mipi nih khuami an thah tiah an kan ti," timi bia a hmaan. Hi nih a langhtermi cu rallokap nih ral le ral lo i hliah hi an i har tuk timi a si. Tuanbia ahcun hi bantuk ral hliah khawh lo ruang ahhin khua meiduah ti pawl hi an rak hmanmi a si. Nihin tiang ah SAC cu mipi cozah ding cu chim lo, an ṭih ngaimi le an zam takmi ralhrang bantuk an si cang. A karlak Tedim Chinnu tlaihhremnak case ti bantuk a hung chuak i, an sining ṭial (rallokap color) te fiang ko in a lang chin duahmah. Cu ruang ah rallokap a dohtu an hung karh duahmah. Local defense force pawl le EAOs pawl an i ready pah cang fawn. Kawl khuate ahcun PDF ral a teimi cu khuami nih conglomhnak he an donmi zong video tete ah a lang len. International ahcun ahlan zarh hnih nakin a ṭhangchomi a um lem rih lo. Hi nih alanghtermi cu 2021 dothlennak cu aa phundangmi a si i, kan ca ah ruahchannak tampi a um timi hi a si. Mipi tam deuh kan i tel ah, kan ṭhawng deuh lai i, kan tei lai.

21/11/2021 
(Sunday)