Voikhat Lio Sweet December

A caan hi asau ngai cang ca ah chim le rel ahhin thinlung hi a fak. Ka thinlung te hi ka thuak nih uk sehlaw mah zaan i, thil sining kha philh seh ka ti tawn. Sinain, cu bantuk i zuamnak cu fingril in ti suah bantuk a si. Atha hnem lo. Snow tomtom nih an hung tla, Ka hmai in ka hmuh khawh tiang rang hiarhuar in an i phah. Mah hi bantuk hi keimah lawng ka kal bal maw, ti ahcun ka kal bal ko. Nain, Sweet december zaan ahcun a si lo. Mi-yong, he kan rak si tawn. Mi-yong hun ti ahcun kei cu hngalh cia ka si. Angki le aban bantuk kan lo. Kan i zul. Kan i khaal. Kan umnak Seoul hmanh hi holh thiam sehlaw, a vawlei in chuah kan i huah hnga. Nain, Nihin ahcun kei cu a hri nih a cah takmi tingttang bantuk in nun man ngei lo in ka um. Ti nih a reu takmi nga bang in nikhat hnu nikhat ka thi diahmah. Chikkhat te ka thih hlan te ah Mi-yong he voikhatnak kan i ton lio kong ka hun tial lai.

Dawh timi hi ruah awk ka rak hngal bal lo. Nain, duh a nungmi hi an i dawh timi khi si men lai tiah, ka rak zumh. 2001 lio sweet december zaan cu um a rak har ngai i ca ciah zong ka huam pah lo ca ah coffee dawr ah kalning, ka ti. Angki fual nawn, ka pa nih arak ka thenhmi ka hun i hruk. Ka lu cu hlanlio japan ralkap luchin ka chin. A kik manh ngai. Climate change an timi hi mah hi pei si ko hi, ka ti pah. First snow a tlak caan ah ngaknu sah ahcun i conak a si tiah Korea kan sayama nih a kan chimmi kha thlalaang kaa bih pah cun ka ruat. “Ei” Nungak hmuhding ahcun van le vawlei an i hnamh ta ahau lai ti phun khin ka thawpi ka hun chuah. Ka herh maw, ti ka ruat lo nain kum 17 ka si cang ca ah ngeih ahcun apoi lem lo ka ti. Coffee dawr lei cun snow a tlami lamh pah in ka’rap ka -rap tiah ka hung kal.

Hi caan hi Stars Bark coffee korea ah a phakkaa a rak si. Coffee dawr hi nihin bantuk in arak lar rih lo. Coffee le rawl te pawl hi cu inn i din eimi ah rak ruah lio chan arak si. Mah hi lio caan hi S.Korea nih Japan he bawm in World Cup tuah a timh lio caan a si ca ah ni-hlawh arak kai ngai. Voidang ton bang ka thut tawnnak a kil lei i thutnak cu ka panh. Noriko Otsu timi Japan catial thiam Suh Kyi a hawinu nih tialmi “Letter for Aung San Su Kyi” timi cauk te relding ah ka hun samh. Ka kiu in cabuai cu ka doh i, cauk cu cawi bu in ka rel. Mah lio ahcun a khaan 5’9” a simi Korea nungak nih a hun ka pah. Ka cauk cu tang ahkhin “phawk” tiah a vung tla. Ka thinhung ngai nain thinhun lio ah thinhunnak langhter lo hi mifim dan a si an ti ca ah a zei poi lo bantuk in ka hung i ser siam.

“Sorry, Ka ngaithiam. Thutnak a um lo ca ah hikaa hin thutnak a lawn tiang ka thu kho ve hnga ma, tiah kan hal hnik i dakaw,...” tiah a kut pahnih aa sih pah in a hun ka hal. Ka mit ka hun thial i, “a ngah ko ee,” tiah ka hun ti. Mah hi tiang hin ahmai ka zoh rih lo. Ka thin cu hung pah kaw, ka lung chung in a cu bantuk nungak cu dah, ka hun ti! Bia pakhat in kan hal lai a ngah ma, tiah a hun ka ti tthan.

“Na cauk i a cuangmi Aung San Su Kyi hi ka uar ngai ve,” a hun ka ti. Mah cu kan rammi uar cu tiah ka lu cu ka hun tun i, ka hun zoh. Aa dawh ngai. Ader pah i, a sam hi a liang a lonh deuh. Ahmuar hi aa piar. Titanic fidi Kate nakin tlawmte in a pan. Nihin i a lar ngaimi Korea fidi Suuzy he khin an i lo pah. “Mah nu kha 1991 i nobel laksawng a comi kha si lo mei,” a hun ka ti. Mah thawk in cun kan bia cu a lan duamah. Kei zong knowledge lei ti bantuk le carel a huammi ka si ca ah kan biaruah cu athaw ngaingai. Kan thu deuhdeuh i, bia ruah a thaw deuhdeuh ve. Nikola Tesla kha na uar ma, ka hun ti ahkhin.... Kei hi science a cawngmi ka si.. Electric lei hi ka cawng tiah a hun ka leh. Tesla hi Edison nakin ka uar deuh ti pawl zong a hun ka chim. Edison le Tesla an buainak te hna kan hung ceih.

A aw hi a tthia i a piang. A holh pah hin a hngawng hi aa thleih lengmang. Bia cu kan i ruah deuhdeuh i, a thli te in ka uar deuhdeuh. G-talks na hmang ma, ahun ka ti. Ka hmang ko ka ti i, ka id cu ka pek. Mah kaa zawn dawr hi ni-nga ni zanlei fatin ka ra tawn tiah a hun ka ti.

“Thutnak a lawng cang e,” tiah an hun auh. Kan i chawn te lai mu a hung ka ti. “Chawnh lawng hlah, tlaih kan duh” tiah ka lungchung in ka ti. Mah hnu cun PC Bang ah zarhkhat nithum ka kal i, ca ka rak kuat lengmang. Mah lio chan ahhin mobile te pawl a rak um rih lo. Iphone ti bantuk hna cu 2007 hnu ceo ah a um i, hi lio hin cun Gtalk le Yahoo te pawl chan arak si. Internet hman duh ahcun PC bang timi Internet dawr ah rak kal arak hau. Cu tin cun kan i kom deuhdeuh tikah ahnu ahcun duhnak timi hri ah kan rak i thlai. Nain, kan pahnih in kan philh khawh lomi 2001 december 1 kha arak si. December 1 a phak fatin tonter kan rak lom tawn.

Dawt deuh kan rak i zuam. Bia kan i ruah ah ngol kan hmang ti lo. Kan huammi aa khat, kan duhmi aa lo. Zei zong vialte ah kan rak tling. Dawtnak ruang ah a tlingmi kan rak si. Nain cucu nihin ahcun fahnak tu ah a hung i thleng.