2020 Myanmar Ram Pumpi Thimnak Result le Chin State Result

Hmanthlak 1 cu 2008 Phunghram zul in tuahmi thimnak pathum (2010, 2015 le 2020) thimnak a result cuaithlaknak a si. Zoh tikah 2010 ahcun USDP nih a rak tei tuk ko hna nain NLD nih thimnak aa cuh hnu ahcun USDP cu a duai duahmah. 2015 ah NLD nih fiang taktak in a tei kan ti nain 2020 thimnak i a tei ning he tahchunh ahcun 2015 a tei ning cu a rak tlawm deuh. 2020 thimnak i NLD nih a tei ning cu khuaruahhar taktak khi a si. .

Hmanthlak 2 cu Hluttaw pathum result a si. Pyituh hluttaw siseh, Amyota hluttaw siseh. Cun, State le Region hluttaw siseh NLD nih 80% leng in fiang khetkhet te in a tei hna. Cucaah, Pyituh Hlutaw le Amyota hluttaw ah NLD bia in bia a tlu lai ding a fiang. Cun, State le Region hluttaw tam deuh zong ah NLD bia in bia a tlu lai ti a fiang fawn fawn.

Hmanthlak 3 cu 2015 thimnak le 2020 thimnak ah Chin ram ah zeitin thimnak a result a rak um ti tahchunhnak a si. Hmuh khawhmi cu 2020 thimnak ahcun NLD nih tam taktak a tei timi a si. 2015 ahcun USDP nih ṭhutnak 4 an rak hmuh ve nain 2020 thimnak ahcun pakhat hmanh an hmu ti lo. ZCD bal cu 2020 zong ah 2015 bantuk in ṭhutnak an hmu ṭhiamṭhiam rih. NLD he a kommi party an si ca ah a si tiah ruah khawh a si. CNLD cu Pu Siang Mang nih pyine hluttaw ah teinak pakhat te a hmu ca ah ṭhutnak pakhat an ngei ve. Ṭhutnak pakhat lawng an co nain remhdaihnak meeting kai ding ticket an co ve ca ah ṭhat hnemnak a um ve ko ti khawh a si.

Hmanthlak - 4 cu adonghnak bik result cu Chin State Parliament result a si. 2020 Pyine hluttaw ca thimnak ahcun NLD nih ṭhutnak 16 a hmuh i, CNLD nih ṭhutnak 1 le ZCD nih ṭhut 1 tin an hmu. Ralkap pa 6 he fonh tik ah 24 an tling. Chim khawhmi cu NLD nih an duh paoh in Chin State Parliament cu an hruai khawh lai timi a si. NLD nih biachahnak cu midang party bawmh hau lo in an tuah khawh lai timi sullam a si.

Ref: UEC, DVB